1 / 1

en Español

Antecedentes

    El modelu de trabayu del ritmu nos años 80, yera un conxuntu de técniques basaes nuna disciplina averada a la militar, con trabayos analíticos, próximos a la ximnasia sueco, nos que se busca'l control del alumnáu al traviés de ritmos ya intensidaes de corte cuasi marcial, y disposiciones y metodoloxíes zarraes (fileres, agrupaciones xeométriques, etc.), au amás l'estilu directivu yera'l filu conductor de les indicaciones per parte de los docentes. Pescúdase entós, que les formes estereotipaes yeren primordiales y que la creatividá pasaba per un mal momentu.

    Énte estos modelos obsoletos de trabayu del ritmu y la dancia bien de docentes y estudiosos proponen nuevos esquemes basaos nel aeróbic y los bailles de salón, al empar qu'alquieren les primeres nociones que xurdieren de les investigaciones nel campu la Espresión Corporal nos INEF, heriedu de la importación conceptual de países como Arxentina.

Tendencies

Entamu

    Del aeróbic escribióse que ye fácil de deprender y que cunta con bona versatilidá pal desendolcu de les clases. So la idea xeneral de la so validez pal trabayu del ritmu n'EF, l'aeróbic asumióse como un conteníu posible n'Espresión Corporal.

    Bien ceo esti conceptu xeneral principió a dixebrase en cualidaes más específiques: dende'l trabayu analíticu individual hasta'l trabayu global del grupu, percepción espacial, temporal, desenrollu de los desplazamientos, los planos, les exes... El so componente lúdicu, asina como'l de los bailles de salón, valoróse como característica favorable pa escoyer el so inxerimientu na clas.

Aeróbic: orixe, conceptu y característiques básiques

    Los oríxenes podemos asitialos na espublización d'un llibru entituláu "aerobics" en 1968 pol Dr. Kenneth Cooper, que na so obra expón un programa d'entrenamientu p'aumentar el rendimientu, la resistencia y amenorgar el riesgu de carecer d'enfermedaes cardíaques y circulatories de los que lo practicaben. Col pasu los años amestóse la música y elementos d'otres disciplines (dancia, jazz, ximnasia...) y creóse lo que nomaron dancia aeróbico, que consiste en baillar al ritmu de la música de forma aeróbica. Asina dixo Charola en 1993.

    Sorraya Padilla (1996) que l'aeróbic pasó de tener un papel prácticamente esclusivu de la población femenino y de los ximnasios, a tener una trescendencia y validez que lu llevaron hasta les mesmes clases d'EF. D'estamiente, los autores que-y atribúin valires específicos, falen en xeneral d'educación del movimientu, musical, rítmico y estético, dominiu corporal... too nun marcu de creatividá y deprendimientu cenciellu, coses (éstes dos caberes) que m'atrevo a xulgar en sentíu contrariu.

Comentariu curtiu: los bailles de salón

    Los bailles de salón aporten nos 90 con muncha fuercia na Europa desendolcao como subproductu de dalgunos bailles tradicionales llegaos de Llatinoamérica o dende Centroeuropa, principalmente. Pronto, les escueles adaptaránles a les sos actividaes extraescolares, mentanto se multipliquen les academies.

    Estes músiques y bailles pasen per un procesu de dignificación que les fai algamar altes cotes de prestixu como actividá físico lúdico-recreativo, enmarcao nel área de la Espresión Corporal. Munchos docentes van sofitase nos sos ritmos y formes pa les sos clases. (Suari, 2002).

    Solliñen dellos precursores d'estes manifestaciones que los sos oxetivos empobínense en trés fasteres estremaes, la fastera técnica o n'específico del baille, la fastera social o d'educación conductual en pareya y en grupu, y la fastera sicomotora. Toes trés, sicasí, interrellacionaes fonderamente. Elementos, que personalmente nun voi discutir sacantes nel apartáu del so afayamientu a los oxetivos xenerales de la EF, al currículu de bas y a los currículos específicos.

Otres propuestes

    Paralelos a la nacencia de las nueves tendencies, basaes na so mayor parte nel aeróbic, xurden otros modelos como alternativa. Dellos profesores d'Educación Físico planteguen l'inxerimientu d'elementos tradicionales y autóctonos, (lo mesmo nes formes musicales y rítmiques como nes dancies y esquemes baillaos), proponiendo alternatives basaes nestos modelos pal trabayu de los conteníos rellacionaos col ritmu, la dancia y la Espresión Corporal.

Lo tradicional como alternativa, ¿por qué?

    Esquemáticamente, unes idees nesta figura:

Afayamientu y adaptación

¿Por qué ye afayadizo?

    Porque ufierta percurioses posibilidaes y estilos, fomentando la educación del movimientu y afondando nos aspectos musicales, estéticos y rítmicos, nun deprendizax cenciellu y prestosu, nel que ye posible que se dea l'apoyu extraescolar familiar en casu de conocese estos esquemes tradicionales, fechu que resulta siempres motivante.

    D'otra, habemos señalar la so importancia cultural máxima, qu'integra conocencies, pero qu'al empar permite al educador físicu trabayar el desendolcu socio-afectivu del escolín, les cualidaes físiques básiques, les cualidaes perceptivo-motores, la Espresión Corporal, Dinámico y Rítmico, sobre too.

    Rellaciona al individuu col so entornu, qu'interpretando la tradición, fomenta los sos llazos identitarios, desenrolla'l so conocimientu cultural, y el so potencial creativu.

Formes d'adaptación: materiales y metodolóxiques.

    Éstes podríen ser les primeres llinies pa desenrollar una adaptación de les dancies tradicionales pa la clas. Tres d'estes cinco primeres recomendaciones, habríemos afondar na so totalidá y esmigayar tolos aspectos específicos. Queremos algamar un afayamientu 100% esitosu d'estes actividaes coreográfiques pa la clas d'Educación Físico.

1. Formes de los pasos: Pretendemos empobinanos contra formes simplificaes, con menos cruces, "pataes", xiros, rotaciones, tresllaciones, "picaos", etc.

2. El cantu: N'aquelles dancies que lleven implícitu l'acompañamientu musical cantáu, podríemos plantegar l'apoyu fonográficu si'l fechu de deprender un cantar supón un problema extra, pola razón que fuere.

3. La música: Nel plantegamientu real de dancia con acompañamientu musical directu (dalgunos instrumentos d'apoyu rítmicu) xurden davezu problemes. Lo recomendable sedrá que se-yos introduza nes sos característiques, pero la so execución fadrála'l docente, o nel so casu mediante soporte fonográficu. (Pandero, palos, castañueles, bombo...)

4. Agarres: Agarrase pelos brazos, los moñinos, pelos coldos... como marquen dalgunos modelos tradicionales, suel convertise nun bon problema, sobre too pa los más nuevos. Tendremos d'utilizar nesos casos, formes más naturales, como por exemplu, los agarres peles manes, desaniciando lo mentao primero.

5. Ditribuciones d'espaciu: Delles distribuciones curvillinies complexes, oblicues, con simetría complicao o asimétriques, planteguen graves dificultades, poro, afuxiremos d'elles y asumiremos otres más naturales (pareyes, círculos, llinies...)

Propuesta: llinies pal diseñu de conteníos

    La propuesta que tamos faciendo tien validez pa tol procesu educativu au la EF tien llugar específicu, nel ámbitu de la Espresión Rítmico, Dinámico y Corporal. Dientro d'esti bloque temáticu la intención ye inxerir conteníos d'estes característiques nes unidaes didáctiques diseñaes pa ello.

    El marcu metodolóxicu ha ser el deprendimientu progresivo dientro los estremaos estilos de dancia y durante tol procesu de la nuesa propuesta, d'una estensión temporal potencial d'hasta 11 años. L'interés d'esta alternativa ta na inclusión d'estos conteníos dientro del bloque temáticu y con plenu drechu, pero non la exclusión d'otros. Andamos a la busca de convivencia harmonioso de los esquemes actuales y tradicionales, pa tresnar un modelu xeneral d'Espresión Rítmico y Dinámico más arriquecedor y con más calter cultural.

    Durante'l deprendimientu progresivo tentamos de pasar de los modelos más globales y colectivos, que desixen menor nivel de memorización, a los más analíticos, d'un mou lo más natural posible.

    Pa la duración total potencial del procesu, plantegamos 6 etapes de trabayu pedagóxicu en progresión:

1. Primeres formes de ritmu con instrumentos tradicionales, movimientu al son d'esos elementos, coreografíes espontánees o semi-espontánees (interveníes).

2. De les coreografíes espontánees al aniciu de les dancies grupales de deprendimientu global.

3. Del grupu total a la segmentación. Usu de complementos nel baille. Tresllación y rotación.

4. Distribuciones espaciales desiguales complexes, asimétriques, y simetría complexo. Acompañamientu y movimientos cenciellos.

5. El baille empareyáu. Movimientos de mediana complicación, xiros y blincos.

6. Formes rítmiques totales, movimientu llibre individual, dominiu de pasos, xiros, rotación y tresllación. Acompañamientu total.

Posibilidá real d'aplicación

    La nuesa propuesta alquier importancia dafechu al demostrar (o a lo menos intentalo) la so validez pa tolos modelos tradicionales. Buscamos asina qu'esti exemplu desenrolláu equí n'aspectos xenerales, sirva precisamente como eso, como una guía xenérica pa tou aquel que-y pete averase a esti camín alternativu que tamos proponiendo.

    La idea alternativa sedría netamente aplicable a cualesquier pueblu que cunte con un repertoriu adaptable de dancies y bailles propios, persiguiendo siempres los mesmos oxetivos xenerales qu'equí solliñemos, les tresversalidaes tamién sedríen les mesmes dientro d'una propuesta de conteníos paecíos anque siempres atendiendo a les normes educatives vixentes, a les característiques concretes de centros y docentes, y sobre too a les característiques específiques de cada repertoriu tradicional.

    Too ello fainos camentar que'l traslláu de la propuesta a cualesquier modelu ye dafechu posible.

Conclusiones

1. El ritmu y la Espresión Dinámico son un elementu integrador del restu de conteníos de la Educación Físico. Ehí mora la so importancia máxima nel procesu formativu.

2. Les nueves tendencies del trabayu del ritmu y la dancia ñacíes pola caducidá de les fórmules antigües, puen ser oxetu de compensación al traviés d'otros modelos.

3. Les dancies y los bailles tradicionales autóctonos puen constituyir un complementu perfectu a estes tendencies. Per aciu d'elles vamos poder desenrollar non sólo los aspectos rellacionaos cola Espresión Corporal, Rítmico y Dinámico, sinón tamién otres munches especialidaes y habilidaes del mundiu la Educación Físico.

4. Al traviés d'un procesu d'estudiu del afayamientu y les adaptaciones lóxiques, les dancies tradicionales integraríense con plenes garantíes dientro de los bloques de conteníos del nuesu campu de trabayu.

5. La nuesa propuesta presenta un altu índiz de capacidá de trespasu a cualesquier esquema autóctono-tradicional.

Fontes bibliográfiques

• Suari, C. y Toyos, C. J. (2002). Trabajo de ritmo y danza, una propuesta desde las danzas y los bailes asturianos, inédito. INCAFD León. León.

• Siguiendo a Padilla y cols. (1996), a Charola (1993) y a Castillo Viera y Giménez Fuentes-Guerra (2001) en Revista Digital Lecturas: Educación Física y Deportes (7:40) http://www.efdeportes.com/efd40/aed.htm

	http://www.efdeportes.com/ · FreeFind
revista digital · Año 10 · N° 68 | Buenos Aires, Enero 2004   © 1997-2004 Derechos reservados