1 / 1

en Español

I. Entamu

    Los nuevos currículos d'Educación Físico contienen claros y amplios espacios pal desendolcu del trabayu de les formes lúdico-físiques tradicionales. Estos espacios diseñaos nun va demasiáu tiempu, son un retu más pal personal docente de la nuesa materia. Nel casu de la Enseñanza Secundario n'Asturies (lo mesmo na obligatoria [ESO], que nel Bachilleratu), el nuevu currículu de resolución de 28 de xunetu de 2002 traxo un nuevu enfoque a los conteníos d'Educación Físico nesta etapa educativa. Los xuegos y deportes tradicionales gocien de tou un bloque propiu tanto n'ESO como en Bachilleratu, anque'l tratu y la descripción d'estos conteníos seya nes más de les vegaes, vagu, imprecisu y probe.

    En resume, un espaciu de proteición pa la nuesa tradición dientro'l sistema educativu, entá ensin abellugu, analís y propuestes, a lo que s'amesta'l calter folclóricu y non-científicu (nin dende'l ámbitu de les Ciencies de la Educación nin dende les de l'Actividá Físico) de los estudios asoleyaos hasta l'actualidá referentes a la nuesa tradición lúdico-física, a la cual toos y toes tenemos la obligación d'aportar los nuesos estudios y esperiencies en forma de conclusiones y proyeutos pa un futuru de normalización de los nuesos xuegos y deportes, yá non sólo nes clases sinón tamién na sociedá en xeneral.

II. Terminoloxía xeneral

    Tentaremos de faer una propuesta de difinición de dellos conceutos, que davezu s'entracamundien o s'empleguen con imprecisión. Términos, que nuna gran parte de les veces, cinquen a una mesma realidá, pero qu'en función a la so acotación semántica, determinen estremaos dominios conceutuales. Foron munchos los autores que quixeron faer esti exerciciu de definición (inclusive tamién nel casu específicu asturianu), con mayor o menor fortuna nes resultancies.

    La propuesta que facemos ye la que vien darréu (Suari, 2001):

Xuegu, actividá natural pero voluntaria, prestosa y motivadora asitiada nun marcu imaxinariu paralelu a la realidá y con un fondu calter socializador, creativu y/o espresivu.

Xuegu motor, actividá física consciente y notable, de calter lúdicu (non trescendente) asitiada nun contestu competitivu pero llibre de reglamentación ríxida ya institucionalización, cola que se trabayen aspeutos motores, sociales y cognitivos del individuu.

Xuegu popular, xuegu conocíu por una determinada población d'un mou natural, normalmente al traviés d'esquemes d'espardimientu oral, y asociáu a un determináu contestu socio-cultural, el d'esa población.

Xuegu tradicional, xuegu caracterizáu pol usu de ferramientes y moos propios d'una tradición concreta y desenrolláu en y como foi típico en dómines pasaes, calteníu anguaño gracies al puxu alitador d'eses formes xugaes, adautándoles ensin estrociar los modelos afitaos nel tiempu como imaxe de la idiosincrasia d'unu o dellos pueblos.

Xuegu rural, xuegu que reproduz nel so desendolcu material y representativu les actividaes típiques de los trabayos y de les costumes del ámbitu rural d'unu o dellos pueblos.

Xuegu autóctonu, xuegu característicu d'una fastera claramente limitada de forma física o cultural, con independencia de que n'otros llugares puean reproducise esquemes paecíos.

Xuegu "d'ayeri", xuegu estinguíu (o práuticamente), recuperáu a un momentu actual gracies a la lliteratura o a la tradición oral qu'informen de les sos carauterístiques, referentes xeneralmente a dómines pasaes nes que la so práutica yera normal y abondosa.

Seudodeporte, actividá física paecía al xuegu motor, más desixente qu'ésti n'aspeutos reglamentarios, competitivos y de desenvolvimientu cognitivu, motor y sicomotor.

Deporte, actividá física consciente y notable, de calter lúdicu (non trescendente), soxeta a unes normes construyíes nun marcu competitivu ya institucionalizáu, de mou más o menos ríxidu y estable.

III. Delles considerances metodolóxiques

    Describimos agora trés bloques de considerances metodolóxiques empobinaes a que'l procesu d'inxertamientu d'estes actividaes na clas nun conlleve l'estrociu del componente cultural ya idiosincrásicu d'estes actividaes.

a. Respeutive al usu de la propia llingua (l'asturiana, nesti casu).

    Paeznos d'importancia indiscutible'l so caltenimientu col oxetivu de respetar al máximo la estructura de lóxica interna (lligada siempres a una verbalización na nuesa llingua) d'estes actividaes lúdico-físiques. Sobre too nos siguientes aspeutos:

• Ferramientes.

• Llugares, descripciones espaciales.

• Nomes de los xuegos y les sos partes, etapes o fases.

• Elementos y aiciones internos/es del xuegu.

b. Respeutive a les ferramientes.

    Pue aconseyase'l caltenimientu de los materiales y les formes orixinales de les ferramientes siempre que les posibilidaes estructurales y económiques de los centros puean permitilo, y siempres qu'esti fechu nun conlleve perxuiciu al educandu. Si nun fore asina (cualesquier d'estos aspeutos) sedría conveniente desenrollar una adautación del material cola fin de poder trabayar con estes actividaes anque les sos carauterístiques pudieren impedilo nun principiu, o anque se detectaren nelles elementos hixénico-sanitarios contraproducentes. Más alantre falaremos de l'adautación.

c. Respeutive a la so normalización nos centros escolares.

    Son los oxetivos pa la dignificación y normalización de los xuegos y los deportes tradicionales nos centros escolares como ferramienta didáutica válida pa:

• Desaniciar l'usu únicu nes actividaes estraordinaries del centru.

• Incluyilos nes actividaes estraescolares de los centros con plenu drechu:

  • Pa da-yos calter cultural-identitariu.

  • P'arriqueceles.

  • Pa coneutales col enseñu reglao.

  • Pa fomentar la creación d'estructures de caltenimientu d'estes actividaes na sociedá.

• Utilizalos como elementu didáuticu de primer orde.

  • Como conteníu obligáu nel casu d'Educación Físico.

  • Como conteníu obligáu nel área d'Estudiu Social (Xeografía, Historia, Cultura Tradicional, Llingua Asturiana...)

IV. Repás del currículu d'Educación Físico de Secundaria

CURRÍCULU ESO DEL PRINCIPÁU D'ASTURIES

    En cuantes a los conteníos del área propios del Principáu d'Asturies, como los Xuegos y Deportes Tradicionales Asturianos (talos como los bolos, la llave, la rana, etc.) apaecen reflexaos nun bloque de conteníu específicu (bloque IV), anque eso nun implica que nun puean tratase nel desarrollu d'otros bloques de conteníu. L'estudiu, conocimientu y práutica d'esti tipu de deportes y xuegos, formen parte perimportante del nuesu padremoñu, y poro, de los conteníos del área de forma destacada, cola fin de preservalos y de fomentar la so caltenencia y práutica énte otros xuegos y deportes d'otros ámbitos culturales que nun s'estremen na so estructura. (Estrayío del currículu d'ESO, de 28 de xunetu de 2002):

BLOQUE IV EN 1u D'ESO

Conceutos

• Xuegu tradicional y xuegu popular.

• Conocencia de los xuegos tradicionales infantiles asturianos.

• Carauterístiques, normes y regles d'un xuegu tradicional infantil asturianu.

Procedimientos

• Rexistrar un xuegu popular infantil asturianu, coles sos carauterístiques y regles y ponelu en práutica na clas.

Actitúes

• Actitú positivo hacia'l trabayu d'alitamientu de los nuesos xuegos como parte fundamental de la cultura tradicional y lúdica del país.

BLOQUE IV EN 2u D'ESO

Conceutos

• Conocencia de los xuegos tradicionales infantiles asturianos.

• Carauterístiques, normes y regles de los xuegos tradicionales infantiles asturianos.

• Clasificación elemental de los xuegos tradicionales infantiles asturianos.

Procedimientos

• Investigar, buscar y rexistrar dellos xuegos populares infantiles que se xugaben antaño, entrevistando a los güelos y les güeles, a los pas y les mas, l'entornu familiar y d'amistaes, y ponelos en práutica nes clases.

• Aniciu nos xuegos de llanzamientu de precisión (como los bolos, la llave, la rana, etc.).

Actitúes

• Valoración de los xuegos tradicionales asturianos como parte del padremoñu cultural del nuesu país.

BLOQUE IV EN 3u D'ESO

Conceutos

• Los bolos, la llave y la rana. Orixe ya historia.

• Carauterístiques del xuegu de bolos de la nuesa fastera, na zona oriental asturiana del birle o bolu palma, nel centru de la cuatriada y nel occidente del pasabolu.

• Reglamentu, normes de xuegu y puntuación.

Procedimientos

• Realización de xeres práutiques pal deprendimientu de los fundamentos téunicos de los bolos, la llave y la rana.

• Xuegu real d'estos deportes tradicionales asturianos.

Actitúes

• Valorar los deportes tradicionales asturianos como parte perimportante de la nuesa cultura.

• Esfrutar con estos xuegos deportivos tradicionales asturianos contribuyendo a la so práutica y caltenencia.

BLOQUE IV EN 4u D'ESO.

Conceutos

• Xuegos y deportes tradicionales asturianos de llanzamientu de precisión: los bolos, la llave y la rana. Orixe, historia, clasificación y carauterístiques.

• Xuegos y deportes tradicionales asturianos de fuercia: el tiru cuerda, el tiru al palu y los pulsos. Orixe, historia, clasificación y carauterístiques.

• Reglamentos, normes de xuegu y puntuación.

Procedimientos

• Práutiques pal deprendimientu y perfeicionamientu de les téuniques de los bolos, la llave y la rana.

• Xuegu real d'estos deportes tradicionales asturianos.

• Práutiques de tiru cuerda por equipos, de tiru al palu y de pulsos.

Actitúes

• Valorar los deportes tradicionales asturianos como parte perimportante de la nuesa cultura.

• Esfrutar cola práutica d'estos xuegos deportivos tradicionales asturianos.

• Contribuyir a la so caltenencia.

CURRÍCULU DE BACHILLERATU DEL PRINCIPÁU D'ASTURIES

    El currículu asturianu propiu d'esta materia y d'esta etapa educativa, afita que los alumnos y les alumnes perfeicionarán los conteníos daos yá na etapa anterior y deprenderán otros nuevos sobre los xuegos y deportes tradicionales del Principáu d'Asturies. (Estrayío del currículu d'ESO, de 28 de xunetu de 2002).

BLOQUE DE XUEGOS Y DEPORTES TRADICIONALES EN BACHILLERATU.

Conceutos

• Historia de los xuegos y deportes tradicionales d'Asturies.

• Clasificación tipolóxica.

• Carauterístiques y reglamentos de los bolos, la llave, la rana, el tiru cuerda, el tiru al palu, el llanzamientu barra y la llucha al baltu.

Procedimientos

• Desendolcar práutiques de perfeicionamientu de las téuniques de bolos, llave y rana. Xuegu real de los mesmos.

• Práutiques coleutives de tiru cuerda y tiru al palu.

• Organización y realización d'un mini-campeonatu de tiru cuerda por grupos mestos ente los alumnos de la clas.

Actitúes

    Valorar los xuegos y deportes tradicionales del nuesu país como un signu d'identidá cultural qu'hemos conocer, prauticar y conservar, bien como xugadores o como espectadores.

V. Formes d'inxertamientu

    ¿Cómo introducir los xuegos y los deportes na actividá normal de la clas? La gran pregunta que toos mos facemos, pero ¿podríemos estremar les formes d'inxertamientu al traviés de la so intencionalidá? Nós intentémoslo, diferenciando les formes normalizadores de les anormalizadores, en función a la so intención de normalizar o non, la presencia de les actividaes lúdico-físiques tradicionales.

    Esta ye la propuesta de clasificación de les formes d'inxertamientu:

1. Anormalizadores. Nun tienen como oxetivu la normalización de los xuegos y deportes tradicionales dientro de la vida del centru educativu. L'inxertamientu anormal ye aquel que se produz con baxa o perbaxa frecuencia y siempres en contestos de estraordinariedá (fiestes de fin de cursu, amagüestu, Nadal...) L'alumnáu asocia la imaxe xeneralmente festiva y siempres estraordinaria a estes actividaes, poro, en nengún momentu lleguen a normalizase.

2. Normalizadores. Amás de los oxetivos que podemos entender como naturales a la hora d'aplicar les actividaes lúdico-físiques a les clases, y en xeneral a les actividaes de los centros, l'inxertamientu normalizador tenta de crear un ambiente natural y facilitador pa qu'estes actividaes se desendolquen d'una forma normal. Pa ello, asítiense en contestos más ordinarios que les anteriores, tienen mayor frecuencia, y non sólo apaecen en contestos festivos. Estremamos trés formes.

b.1. Intensives. Si tamos falando de la clas, sedrá (nesti casu) d'una o delles unidaes didáutiques concretes dedicaes a la conocencia y/o práutica de los xuegos y deportes tradicionales, si son actividaes estraescolares, falaremos d'un determináu tiempu dedicáu esclusivamente a estos conteníos. La carauterística fundamental d'esta forma d'inxertamientu ye la intencionalidá normalizadora en contestos ordinarios pero ensin llegar a aplicar les actividaes tradicionales como ferramienta pedagóxica n'otros conteníos, ye por eso que dicimos que tien claru calter intensivu.

b.2. Estensives. Ye una aplicación espardida nel tiempu, na que les actividaes tradicionales ganen categoría de "ferramienta de trabayu" pa otros conteníos, mesmo na clas d'E.F. como n'otres árees, o dientro de les actividaes estraescolares. Sicasí, ye la forma más estraña, pos los docentes concienciaos col tema apliquen davezu non sólo l'inxertamientu estensivu, sinón tamién l'intensivu, lo que ye un inxertamientu total.

b.3. Totales. Como dicíemos enantes, l'inxertamientu total ye la forma normalizadora mayor, amestando bloques de conocimientu de calter intensivu, con un usu estensivu d'esti tipu de recursos a lo llargo de los demás conteníos. Ensin dulda, la forma a siguir si la nuesa intención ye normalizar los xuegos y deportes tradicionales dientro de la vida común de los centros educativos.

VI. Repertoriu tradicional, repertoriu pa la clas

    ¿Cuálu ye'l repertoriu tradicional asturianu? En verdá, anguaño, nun sabemos entá en qué puntu tamos dientro del procesu d'alitamientu de la nuesa cultura tradicional (no físico tampoco), pero lo que sí ta claro ye qu'entá esisten gravísimes (pero subsanables) faltes na vertebración d'un repertoriu clasificáu d'un mou amañosu y afayadizu pa la función educativa. Pero ésti nun ye'l oxetivu d'esti artículu (anque sí motivu de trabayu, actualmente, pa los investigadores de la Federación Asturiana de Deportes Tradicionales), namás queremos amosar equí esquemáticamente la bayura d'elementos cola que podemos cuntar pa la nuesa actividá docente.

Xuegos infantiles tradicionales, son los xuegos arreyaos tradicionalmente al tiempu de fuelgu infantil, diseñaos y actualizaos polos propios neños al traviés del tiempu, son los que normalmente s'afayen más a les sos carauterístiques y poro, a los oxetivos de cada etapa educativa, falando yá de la so aplicación na clas. Puen clasificase de munches formes y dalgunos exemplos na tradición asturiana (siguiendo a Ruiz Alonso, 2001) son la queda, el pañuelín, les cuatro esquines, l'aru y la gancheta, les gomes, el cascayu, los zancos, el pinchu, les chapes, a manaes, la gocha, l'esconderite... y un perllargu etcétera.

Xuegos tradicionales (entendíos en sentíu ampliu), son actividaes que se caltienen nel tiempu, xeneralmente derivaes del trabayu diariu gracies a la difusión oral y xugada, y que constitúin la bas de la tradición lúdico-física. Esisten xuegos rellacionaos cola mina o coles actividaes del campu, asina como cola actividá marinera... Por exemplu, el cabruñu, les cucañes, la siega, los entibadores, les carreres populares...

Seudodeportes tradicionales construyíos, son modificaciones nes regles y nos elementos de los xuegos (p'añedi-yos complexidá) o nos deportes (pa disminuir la complexidá). Por exemplu tomando la gocha, un xuegu infantil, podemos diseñar un seudodeporte, delimitando los espacios, el tiempu y modificando les regles básiques, pa da-y un calter más ríxidu, más deportivizáu.

Seudeportes tradicionales en camín de deportivización, son formes de xuegu que tán pasando per un procesu d'institucionalización y de reglamentación, seudodeportes que de concluyir la so institucionalización y d'afitar el sistema competitivu y reglamentariu, convertiríense automáticamente en deportes. Anguaño, n'Asturies tenemos nesta situación la carrera panoyes, la carrera madreñes, el baltu, el llevantamientu de sacu, el pulsu...

Deportes tradicionales, aquelles formes físiques tradicionales qu'acabaron el so procesu de deportivización (institucionalización, competición y reglamentación) y que güei alcuéntrense reconocíos como talos. Bolos, corta de tueros, tiru cuerda, tiru al palu...

VII. Les posibilidaes xenerales pa la clas d'EF

    Tentaremos de facer un análisis mui xeneral y cenciellu col oxetivu de ver como'l xuegu y el deporte tradicional, falando en sentíu ampliu, puen non sólo acutar un llugar preferente dientro de los bloques de conteníu específicos, sinón que puen ser oxetu y/o complementu n'otros bloques inespecíficos, cola fin d'algamar un inxertamientu normal y total d'estes actividaes. Pa ello espondremos de nueves tolos conteníos d'ESO y de Bachilleratu, señalando en cada casu'l llugar que puen ocupar les actividaes físiques tradicionales (SÍ, oxetu; SÍ, complementu; o NON).

    Observái nestos cuadros cómo los xuegos y deportes tradicionales puen tar presentes (lo mesmo como oxetu que como complementu) en 9 de los 11 bloques de conteníu, una presencia mayoritaria ya indiscutible, que nun dexa llugar pa les escuses cuando buscamos l'inxertamientu normal y total d'estos elementos de trabayu.

    (*) Cuando falamos de NON*, referímonos a que los xuegos codificaos más o menos habituales dientro del repertoriu asturianu, nun s'adauten (xeneralmente) a los oxetivos d'estos dos bloques de conteníu rellacionaos col Ritmu y la Espresión Corporal, cosa que nun ye contraria a que determinaes formes lúdiques tradicionales nun puean tar incluyíes nestos bloques, de la mesma manera qu'encamentamos la inclusión n'éstos de les formes coreográfiques y musicales tradicionales, tema maraviyosu qu'amerita fondes investigaciones particulares.

VIII. L'adautación y l'afayamientu

    L'adautación ye'l procesu de camudamientu de les carauterístiques que nun s'afayen a una actividá (nos sos elementos, nes sos regles) cola fin de qu'esa actividá s'afaye dafechu a los oxetivos que mos plantegamos pal trabayu con un grupu humanu concretu.

Parámetros d'adautación:

• Edá (etapes de desenrollu sicobiolóxicu).

• Sexos (sedrá necesario atender a esti parámetru según les etapes y actividaes).

• Carauterístiques especiales, coleutivos con dificultaes:

  • Físico-sicolóxiques.

  • Sociales.

Oxetos d'adautación:

• Llugares.

• Elementos, oxetos.

• Distancies, tamaños.

• Espacios.

• Reglamentu...

IX. Sumariu

1. Resume, pallabras llave. Abstract, key words.

2. Entamu.

3. Terminoloxía xeneral.

4. Delles considerances xenerales.

5. Repás del currículu d'Educación Físico de Secundaria.

6. Menes d'inxertamientu.

7. Repertoriu tradicional, repertoriu pa la clas.

8. Les posibilidaes xenerales pa la clas d'EF.

9. L'adautación y l'afayamientu.

10. Sumariu.

Fontes bibliográfiques

• Öfele, M. R. (1999) Los juegos tradicionales y sus proyecciones pedagógicas. Lecturas: Educación Física y Deportes. Revista digital, [4:13]. Buenos Aires.

• Ruiz Alonso, J. G. (2001) Juegos y deportes tradicionales de Asturias. Alborá Llibros, Xixón.

• Suari, C. (2001) Propuesta terminolóxica en materia de xuegu y deporte tradicional. Inéditu.

	http://www.efdeportes.com/ · FreeFind
revista digital · Año 9 · N° 65 | Buenos Aires, Octubre 2003   © 1997-2003 Derechos reservados